अहिल्यानगर, प्रतिनिधी –

संगमनेर तालुक्यातील वडगावपान येथे ११ वर्षीय मुलीवर झालेल्या दुर्दैवी ॲसिड हल्ल्याच्या घटनेची गंभीर दखल घेत, पीडितेच्या पुनर्वसनासाठी जिल्हा प्रशासनाने तातडीने पावले उचलली आहेत. ‘पीडितांना नुकसानभरपाई देण्याबाबत योजना, २०२२’ अंतर्गत पीडितेसाठी एकूण ३ लाख रुपयांचे आर्थिक साहाय्य मंजूर करण्यात आले असून, ही संपूर्ण रक्कम वितरित करण्यात आली आहे, अशी माहिती जिल्हा विधी सेवा प्राधिकरणाचे सचिव योगेश पैठणकर आणि जिल्हा महिला व बाल विकास अधिकारी संजय कदम यांनी दिली.

या प्रकरणाच्या पार्श्वभूमीवर जिल्हा विधी सेवा प्राधिकरणाचे अध्यक्ष तथा प्रमुख जिल्हा व सत्र न्यायाधीश शिवाजी कचरे यांच्या मार्गदर्शनाखाली १८ मार्च २०२६ रोजी संबंधित समितीची तातडीची बैठक आयोजित करण्यात आली होती. या बैठकीत झालेल्या निर्णयानुसार, पीडितेच्या आईच्या बँक खात्यावर तातडीने १ लाख रुपयांची प्राथमिक मदत जमा करण्यात आली.

त्यानंतर, आज मंगळवारी (२४ मार्च) समितीची पुढील बैठक पार पडली. या बैठकीत परिवीक्षा अधिकाऱ्यांनी सादर केलेल्या गृह चौकशी अहवालाचे सविस्तर परीक्षण करण्यात आले. या अहवालाच्या आधारावर समितीने पीडितेच्या आईच्या बँक खात्यात अतिरिक्त २ लाख रुपये जमा करण्यास मान्यता दिली. अशा प्रकारे पीडितेसाठी मंजूर करण्यात आलेली ३ लाखांची संपूर्ण आर्थिक मदत वितरित करण्यात आली आहे.