संगमनेर | महासंगम न्यूज ऑनलाईन
संगमनेर नगरपरिषद सार्वत्रिक निवडणुकीचा निकाल उद्या रविवारी (२१ डिसेंबर) जाहीर होणार आहे. सहकार महर्षी भाऊसाहेब थोरात क्रीडा संकुल परिसरात ही मतमोजणी प्रक्रिया पार पडणार असून, या पार्श्वभूमीवर शहराच्या वाहतूक व्यवस्थेत मोठे बदल करण्यात आले आहेत. कायदा व सुव्यवस्था राखण्यासाठी प्रशासनाने अनेक प्रमुख रस्ते वाहतुकीसाठी पूर्णपणे बंद ठेवण्याचा निर्णय घेतला आहे.
🚫 हे रस्ते राहतील पूर्णपणे बंद –
उद्या सकाळी मतमोजणी सुरू झाल्यापासून प्रक्रिया संपेपर्यंत खालील मार्गांवर सर्व वाहने व नागरिकांना प्रवेश नाकारण्यात आला आहे.
ईदगाह मैदान ते नेहरू गार्डन: हा मुख्य रस्ता पूर्णपणे बंद राहील.
शहर पोलीस स्टेशन ते संजय गांधी नगर: या मार्गावर बॅरिकेडिंग करण्यात आले असून प्रवेश बंद असेल.
वकील कॉलनी व अभंग मळा: या भागातून क्रीडा संकुलाकडे येणारे सर्व अंतर्गत रस्ते बंद राहतील.
बॅडमिंटन हॉल कोपरा व गेट नं. १: येथे कडक नाकाबंदी करून प्रवेश थांबवण्यात येईल.
🅿️ पार्किंगची अशी असेल व्यवस्था –
उमेदवार, प्रतिनिधी आणि अधिकारी यांच्यासाठी प्रशासनाने स्वतंत्र पार्किंग झोन निश्चित केले आहेत:
उमेदवार व प्रतिनिधी: पेटीट कॉलेज आणि सिद्धार्थ हायस्कूल मैदान. (सिद्धार्थ हायस्कूलकडे जाण्यासाठी ‘शहर पोलीस स्टेशन – संजय गांधी नगर – सिद्धार्थ शाळा गेट’ या मार्गाचाच वापर करावा).
अधिकारी व कर्मचारी: कवी अनंत फंदी समोरील बेसमेंट, तहसील कार्यालय परिसर आणि नियुक्त पार्किंग ठिकाणे.
⚠️ मतमोजणी केंद्रावर जाताना हे नियम पाळा! –
मतमोजणी केंद्रात प्रवेश मिळवण्यासाठी प्रशासनाने काही कडक अटी घातल्या आहेत:
ओळखपत्र: निवडणूक निर्णय अधिकाऱ्यांनी दिलेले ‘व्हॅलिड आयडी कार्ड’ असणे अनिवार्य आहे.
प्रतिबंधित वस्तू: मोबाईल फोन, स्वतःचे पेन, कागद किंवा कोणतीही इलेक्ट्रॉनिक्स वस्तू नेण्यास सक्त मनाई आहे.
साहित्य: नोंदीसाठी आवश्यक पेन आणि रायटिंग पॅड प्रशासनाकडूनच दिले जाईल.
तपासणी: त्रिस्तरीय पोलीस बंदोबस्त तैनात असून कडक सुरक्षा तपासणीनंतरच प्रवेश दिला जाईल.
📢 निकाल कुठे ऐकायला मिळणार? –
नागरिकांना फेरीनिहाय निकालाची माहिती मिळावी यासाठी प्रशासनाने ४ ठिकाणी सार्वजनिक उद्घोषणा यंत्रणा लावली आहे:
१. बॅडमिंटन हॉल बाहेरील परिसर.
२. ईदगाह मैदानाकडील परिसर.
३. क्रीडा संकुल गेट क्रमांक १.
४. संगमनेर शहर पोलीस स्टेशन समोर.
निवडणूक निर्णय अधिकारी अरुण उंडे आणि पोलीस प्रशासनाने सर्व नागरिकांना सहकार्य करण्याचे आवाहन केले आहे.