संगमनेर: महाराष्ट्र संवाद न्यूज

दारूचे व्यसन हा केवळ एक स्वभावदोष नसून तो एक गंभीर मानसिक व शारीरिक आजार आहे, असे अमेरिकन मेडिकल असोसिएशननेही स्पष्ट केले आहे. या आजाराच्या विळख्यातून बाहेर पडणे अनेकांना कठीण जाते, मात्र योग्य मार्गदर्शन लाभल्यास मद्यपी पुन्हा सन्मानाचे आयुष्य जगू शकतात. याच उदात्त हेतूने ‘अल्कोहोलिक ॲनॉनिमस’ (ए.ए.) या जागतिक संस्थेच्या वतीने संगमनेर शहरात एका विशेष ‘जनजागरण सभे’चे आयोजन करण्यात आले आहे.

ही महत्वपूर्ण सभा उद्या शनिवारी, २७ डिसेंबर रोजी दुपारी चार ते सहा या वेळेत संगमनेरमधील भंडारी मंगल कार्यालय येथे संपन्न होणार आहे. ज्या व्यक्तींना स्वतःची दारू सोडण्याची तीव्र इच्छा आहे किंवा ज्यांच्या कुटुंबात व्यसनामुळे सतत संघर्ष आणि दुःख निर्माण झाले आहे, अशा सर्वांसाठी ही सभा दिशादर्शक ठरणार आहे. विशेष म्हणजे, या संस्थेचे कार्य पूर्णपणे विनामूल्य चालते आणि सहभागी होण्यासाठी कोणतेही शुल्क आकारले जात नाही.

केवळ एका सभेपुरते मर्यादित न राहता, संगमनेरमध्ये सातत्यपूर्ण मार्गदर्शनासाठी ‘ए.ए. स्वीकार समूह’ देखील सक्रिय आहे. या समूहाची साप्ताहिक सभा दर रविवारी सकाळी अकरा ते साडेबारा या वेळेत नाशिक रोडवरील सह्याद्री ज्युनियर कॉलेज येथे घेतली जाते. या संपूर्ण उपक्रमाचा लाभ घेऊन जास्तीत जास्त नागरिकांनी व्यसनमुक्त होण्याच्या दिशेने पाऊल टाकावे, असे आवाहन अल्कोहोलिक ॲनॉनिमस सेवा समितीने केले आहे.

या जनजागरण सभेबद्दल अधिक माहितीसाठी अथवा मदतीसाठी ९८५०१३९२०७, ७७६७०९१४२२, ७४९९०७७०४७, ९४२२६ ७५८४९ मोबाईल क्रमांकावर संपर्क साधता येईल. “व्यसनमुक्त व्हा, आनंदी जगा” हा संदेश घराघरात पोहोचवण्यासाठी नागरिकांनी या सुवर्णसंधीचा लाभ घ्यावा, असे आवाहन समितीच्या वतीने करण्यात आले आहे.